V Edición. Curso 2011-2012 !!

Este Máster Propio da USC (60 créditos ECTS) céntrase no ámbito do coñecemento específico da arte das últimas décadas, abarcando desde aspectos conceptuais e críticos, ata a práctica do mundo dos museos e a xestión da arte contemporánea. Está orientado a todos aqueles que queiran formarse como profesionais especializados no mundo da arte contemporánea: crítica, museos, centros de arte, galerías. Para entender todos estes fenómenos adoptaranse ademais dos métodos tradicionais, modelos transversais combinados con clases e obradoiros de tipo práctico.

Visita Fundación Serralves. Oporto.

Está dirixido a Licenciados ou Diplomados en Historia da Arte, Historia, Xeografía, Filosofía, Filoloxía, Humanidades, Ciencias da Comunicación, Socioloxía, Belas Artes e Arquitectura, así como a profesionais do sector con experiencia acreditada. Entre o seu persoal docente atópanse profesionais de recoñecido prestixio como Simón Marchán, Estrella de Diego, Gloria Moure, Jesús Carrillo, Joâo Fernandes, Alberto Ruiz de Samaniego entre outros especialistas, nacionais e internacionais.

OBXECTIVO. O Máster naceu de cubrir carencias do sistema universitario actual mediante a formación especializada na arte do século XX de toda unha xeración de alumnos de carreiras como Belas Artes, Historia da Arte, Filosofía, Ciencias da Comunicación e Humanidades en xeral. Creación, intermediación, xestión e dirección de proxectos artísticos de cara á profesionalización é o obxectivo fundamental deste curso que tenta que as competencias adquiridas teñan a súa aplicación no mundo laboral.

VÍNCULO COA REALIDADE. Co máster intentábase cubrir unha nova demanda social. Nos últimos vinte anos naceron no Eixo Atlántico –o percorrido entre Ferrol e Porto– entre 30 e 40 espacios vinculados coa arte contemporánea. A nova situación obrigaba a facer un esforzo formativo sen precedes, adaptado a esa realidade. Dous tercios das clases teñen lugar nunha desas institucións: as salas do CGAC (Centro Galego de Arte Contemporánea).

PRÁCTICAS E ÁMBITO LABORAL. Para facilitar esa relación coa realidade e a inserción laboral do alumnado articulamos un sistema de clases e prácticas adaptado á situación actual do mundo profesional:

- OBRADOIROS a cargo de profesionais desas novas institucións e do mundo da crítica de arte. Escrita de críticas en prensa especializada.

- PRÁCTICAS nas institucións e entidades máis representactivas de Galicia (xunto co CGAC, o MARCO, MACUF, AUDITORIO DE GALICIA, ESPACIO ATLÁNTICO, DARDO).

- COMISARIADO DE EXPOSICIÓNS dos alumnos (tanto colectivas como individuais) xurdidas dos propios obradoiros e dun concurso coa  ZONA C (espazo para xoves artistas xestionado polo Concello de Santiago) ao que só poden acceder os alumnos do máster. Ata o presente xa se fixeron diferentes EXPOSICIÓNS (na Fundación Torrente Ballester, na Zona C,...) comisariadas polos alumnos, que traballaron con financiamento real e con artistas en activo. En outubro deste ano inaugurarase outra no Colexio de Fonseca (Santiago de Compostela).

PROFESORADO DE PRESTIXIO. Para dar forma a este proxecto non bastaba con botar man dos profesores da USC. Precisabamos contar con moitos técnicos das institucións citadas e con algúns grandes especialistas en arte contemporánea, todas elas figuras de recoñecido prestixio, tanto nacionais como internacionais, do mundo da arte contemporánea.